Odayaasha beelaha Hawiye oo ka digay in la musuq-maasuqo xildhibaanada loo soo xulayo Baarlamanka cusub

Mogadishu Isniin 13 August 2012 SMC

Naga soo wac halkan (Skype)

Odayaasha beelaha Hawiye oo ka digay in la musuq-maasuqo xildhibaanada loo soo xulayo Baarlamanka cusub

Odayaasha golaha dhaqanka iyo midnimada beelaha Hawiye oo maanta kulan ku yeeshay magaalada Muqdisho ayaa ka digay in la musuq maasuqo xildhibaanada cusub ee baarlamanka Somalia ee soo socda.

Kulanka ka dib ayaa waxaa saxaafada la hadlay Maxamed Xasan Xaad gudoomiyaha golaha dhaqanka iyo midnimada beelaha Hawiye oo halkaas ka aqriyey War-saxaafadeed ka soo baxay kulankooda, wuxuuna xusay iney ugu baaqayaan odayaasha beelaha iney soo xulaan xildh0ibaano hufan, howshoodana u qabsadaan qaab cadaalad iyo sinaan leh.

War saxaafadaeedka ay soo saareen odayaasha beelaha Hawiye ayaa u qornaa sidatan:-

Ujeedo:
War-saxaafadeed.

Maanta oo taariikhdu tahay 13-8-2012 ayaa waxaa kulan xasaasi ah iskugu yimid odayaasha Muqdisho, waxayna ka wada hadleen qodobo ay ka mid ahaayeen amaanka Muqdisho, musuq-maasuq la sheegay inuu ka jiro habka xilida baarlamanka, u sinaan la’aanta musharaxiinta ee warbaahinta dowlada iyo baahida loo qabo in
xubnaha ee baarlamanka ay noqdaan kuwo lagu soo xulo karti aqoon iyo waayo aragnimo.

Gebagebadii kulankaasi waxay odayaashu dood dheer iyo falanqeyn ka dib soo saareen War saxaafadeedkan:-

1) Ugu horeyntii waxay bogaadinayaan ciidamada dowlada KMG ah iyo kuwa AMISOM guulihii is dana jooga ahaa ee ay ka gaareen soo celinta nabada magaalada Muqdisho, taasoo keentay in Soomaali badan ay dalka ku soo laabtaan,
hase ahaatee waxay odayaashu ka digayaan ineysan carqalad ku imaanin amnigaas xiligan lagu jiro ololaha doorashooyinka, waxayna ugu baaqayaan dowlada iyo murashaxiinta iney iskaashi ka sameeyaan ilaalinta amaanka.

2) Dhaqanku waa dhaxalka qura ee u haray ummada Soomaaliyed markii ay wax kasta burbureen, maanta oo loo fadhiyo iney KMGnimada dalka ka saaraan waxaan ka digeynaa in lagu fududaado ku eedeeynta odayaasha ee musuqmaasuqa, waxaana ugu baaqeynaa dhaqanka Soomaaliyeed ee ku howlan xulida xubnaha Baarlamanka iney la yimaadaan cadaalad iyo hufnaan soona xulaan dad aqoon iyo karti leh.

3) Warbaahinta Qaranku waa hanti ka dhexeysa dhamaan ummada Soomaaliyeed, loona abuuray iney ka shaqeyso danta guud iyo maslaxada umada Soomaaliyeed hadaba odayaashu waxay diirada saareen sida loogu baahan yahay in warbaahinta
Qaranku si siman ugu adeegto musharaxiinta, waxayna ka codsanayaan madaxada dowlada iney ogolaadaan in musharaxiintu adeegsadaan warbaahinta Qaranka ama joojiyaan iney ololahooda doorashada u adeegsadaan.

4) Odayaashu waxay ugu dambeyn ugu baaqayaan ugu dambeyntii xubnaha cusub ee baarlamanka iney shacabka soomaaliyed u soo doortaan madax ama hogaamiye leh, aqoon karti, sumcadna leh dalka dibeda iyo beesha caalamka.

Wabilaahi Towfiiq

Maxamed Xasan Xaad

Gudoomiyaha beelaha Muqdisho

Maxamuud Axmed Xasan
Web Updating, Somaliweyn Website
xuurshe20@hotmail.com - Xuurshe114@gmail.com 
www.somaliweyn.com 

Naga soo wac halkan (Skype)

Somaliweyn Media Center (SMC)

contact@somaliweyn.com